Se font pluseurs sages qui font a croire

De commun cours chacun a trop plus chiers De Fortune les biens, que de Nature ; Mais c’est a tort, car ilz sont si legiers Qu’on n’en devroit a nul fuer avoir cure. Boëce en fait mension En son livre de Consolacion, Qui repreuve de Fortune la gloire ; Si font pluseurs sages qui font a croire. Et non obstant que ces dons soient chiers, Et que chacun a les avoir met cure, Si veons nous qu’honneurs et grands deniers Tôt deffaillent, et a maint petit dure La grant exaltacion De Fortune, qui a condicion De tôt changier, ce nous dit mainte hystoire ; Si font pluseurs sages qui font a croire. Mais si certains de Nature et entiers Sont les grands biens, que nulle creature N’en est rempli, qui lui soit ja métiers D’avoir paour de Fortune la dure. C’est sens et discrecion Entendement, consideracion, Aristote moult apreuve mémoire ; Si font pluseurs sages qui font a croire.