Je ne m’i vueil plus tenir

Je ne te vueil plus servir, Amours, a Dieu te comand. Tu me veulz trop asservir, Et paier mauvaisement ; Pour loyer me rends tourment. C’est fort chose a soutenir : Je ne m’i vueil plus tenir. Pour ta grace desservir, Je t’ai servi loiaument, Mais je ne puis assovir Mon service, car griefment, Me tourmentes, dont briefment Aime mieulx, m’en revenir : Je ne m’i vueil plus tenir. Qui a toi se veut plevir, Et donner entièrement, Puis descendre, puis gravir, Selon ton commandement, Lui convient peniblement ; Si m’en doit bien souvenir : Je ne m’i vueil plus tenir.