Le dieu d’amours m’en soit loyal tesmoins

Douce dame, veuillez moi pardonner Se demouré ai un pou longuement ; Car je n’ai peü plus tôt retourner, Dont me desplaist ; car trop d’empeschement M’est survenu, mais croiez fermement Que votre suis, ou soie près ou loin, Le dieu d’amours m’en soit loyal tesmoins. J’ai bien cuidé la ma vie finer, Tant eus de mal pour le departement De vous, trés belle, et, sans joie mener, J’ai la été trés le commencement Jusqu’a la fin ; car resjouïssement Je n’ai sans vous, fors mal et tous besoings, Le dieu d’amours m’en soit loyal tesmoins. Or suis venu, veuillez moi ordener Votre vouloir, car vo commandement Vueil obeir, et je me dois pener De vous servir ; ne ferai autrement Tant quan vivray, sachiez certainement. Car la sont tous mes pensers et mes soins, Le dieu d’amours m’en soit loyal tesmoins.