Ballade XII (Ce que l’ueil despend en plaisir)

Ce que l’ueil despend en plaisir, Le cueur l’achette chierement, Et, quant vient à compte tenir, Raison, president sagement. Demande pour quoi et comment Est despendue la richesse Dont Amours deppart largement. Sans grant espargne de liesse. Lors respond Amoureux Désir : Amours me fit commandement De Joyeuse Vie servir, Et obéir entièrement ; Et, s’ai failly aucunement. On n’en doit blâmer que Jeunesse Qui m’a fait ouvrer sotement. Sans grant espargne de liesse. Pas ne mourrai sans repentir, Car je m’en repens grandement ; Trouvé m’y suis pis que martir, Souffrant maint doloureux tourment ; Désormais en gouvernement Me metz et ès mains de Vieillesse, Bien sais qu’y vivray soubrement. Sans grant espargne de liesse. Le temps passe comme le vent, Il n’est si beau jeu qui ne cesse, En tout fault avoir finement, Sans grant espargne de liesse.