Ballade XIII (Je, qui suis Fortune nommée)

Je, qui suis Fortune nommée, Demande la raison pourquoi On me donne la renommée Qu’on ne se puet fier en moi Et n’ai ne fermeté ne foi ? Car, quant aucuns en mes mains prends, D’en bas je les monte en haultesse Et d’en haut en bas les descens, Monstrant que suis Dame et maîtresse. En ce, je suis à tort blasmée, Tenant l’usage de ma loy Que de long temps m’a ordonnée Dieu, sur tous le souverain Roi, Pour donner au monde chastoy. Et, se de mes biens je despens Souventesfoiz, à grant largesse, Quant bon me semble, les suspens, Monstrant que suis Dame et maîtresse. C’est ma manière acoustumée, Chacun le sait, comme je crois, Et n’est pas nouvelle trouvée, Mais, fays ainsi comme je dois. Me mocquant, je les montre au dois Tous ceux qui en sont mal contens ; En gré pregnent joie ou destresse, Qu’ayent l’un des deux me consens, Monstrant que suis Dame et maîtresse. Sur ce, s’advise qui a sens, Soit en jeunesse ou en vieillesse, Et qui ne m’entent, je m’entends, Monstrant que suis Dame et maîtresse.