Sont ilz aise ? certes je crois que non

Par ces moustiers vois venir et aller Maint amoureux gracieux et faitis, Qui n’osent pas a leurs dames parler Pour mesdisans qui trop sont ententis D’eux agaitier, dont les amans gentilz S’en vont souvent qu’ilz n’en ont se mal non. Et quant ilz sont de l’eglise partis, Sont ilz aise ? certes je crois que non. Et se bien ont, je crois qu’au paraler Moult chierement il leur soit departis Car, qui se veut selon amours riuler, Il n’a mie pour soi tous bons partis. Amours les tient subgiez et moult craintis Que de leur fait il soit aucun renom. Ytelle gent, soient grands ou petiz, Sont ilz aise ? certes je crois que non. Mais des mauvais on ne se doit mesler ; Car bien n’en ont, ne mal, mais alentis Ilz sont d’amer et ne scevent celer ; Malicieux, decepvans et faintis Sont, et mauvais et en leurs fais soubtilz ; Mais ne leur chaud s’ilz sont aimez ou non. Se bien leur vient a si pou d’apetis, Sont ilz aise ? certes je crois que non.