Ballade XXI (Loué soit celui qui trouva)

Loué soit celui qui trouva Premier la manière d’escrire ; En ce, grant confort ordonna Pour amans qui sont en martyre ; Car quant ne pevent aller dire À leurs dames leur grief tourment, Ce leur est moult d’alegement Quant par escript pevent mander Les maux qu’ilz portent humblement, Pour bien et loyaument amer. Quant un amoureux escrira Son deuil, qui trop le tient de rire, Au plus tôt qu’envoyé l’aura À celle qui est son seul mire. S’il lui plaît à la lettre lire, Elle peut véoir clerement Son doloreux gouvernement. Et lors Pitié lui sait montrer Qu’il dessert bon guerdonnement, Pour bien et loyaument amer. Par mon cueur je congnois pieçà Ce métier, car quant il soupire, Jamais rapaisié ne sera Tant qu’il ait envoyé de tire Vers la belle que tant desire. Et puis s’il peut aucunement Oïr nouvelles seulement De sa douce beauté sans per, Il oublie l’ennui qu’il sent Pour bien et loyaument amer. Ma Dame, Dieu doint que briefment Vous puisse de bouche compter Ce que j’ai souffert longuement Pour bien et loyaument amer.