Ou autrement l’amour est fausse et fainte

Maintes gens sont qui veulent par maistrise Les biens d’amours avoir et acquerir ; C’est grant folour ; car n’est droit qu’en tel guise On doie amours contraindre et surquerir. Car humblement on doit ce requerir Qui est donné franchement sans contrainte, Ou autrement l’amour est fausse et fainte. Et s’il advient qu’aucuns aient acquise Icelle amour par grant soing de querir, A eux vuelent qu’elle soit si soubzmise, Comme se droit leur faisait conquerir ; Pour ce souvent font la douceur perir Qui doit être par douce grace attainte, Ou autrement l’amour est fausse et fainte. Si n’y doit nul user de seigneurise, N’en fait, n’en dit, mais mieulz voloir mourir, Que maistrisier le doulz don que franchise Fait ottroier et rigueur fait perir ; Bien servir doit, pour guerredon merir, Le vrai amant obeïr en grant crainte, Ou autrement l’amour est fausse et fainte.