J’en ai fait a maint reffus

Ne cuidiez pas que je soye Si folle, ne si legiere, Sire, qu’accorder je doye M’amour a toute prière : Trop seroye vilotiere, Ce que oncques mais ne fus ; J’en ai fait a maint reffus. Ja pour ce ne vous anoye, Ne me faites pire chère, Car amer je ne saroye, Ne je n’en suis coustumiere, Pour homme qui m’en requiere ; Apprendre n’en vueil les us ; J’en ai fait a maint reffus. Ne faire je n’en vouldroie En fais, en dis, en manière, Chose que faire ne doye Femme qui honneur a chère. Trop mieulx vouldroie être en bière. Pour ce, soient beaulx ou drus, J’en ai fait a maint reffus.