Ha desloial ! comment as tu le cuer ?

Trés faux parjur, renoyé plein de vice, Plus que Judas rempli de traïson, De tout mon cuer t’ai aimé comme nyce, N’oncques vers toi ne pensay mesprison, Et pour autre me laisses sans raison. Ne deusses pas ce moi faire a nul fueur ; Car tu me metz en trop dure friçon. Ha desloial ! comment as tu le cuer ? Dieux, que feist on de telle gent justice ? On en pent maint a trop moins d’achoison, Se m’en vengier peüsse, je garisse Des maux que j’ai pour toi a grant foison. Que fusses tu destroit en ma prison ? Ton grant orgueil m’atasse, et la grandeur Dont tu me fais vivre a tel cuisançon. Ha desloial ! comment as tu le cuer ? De mes bienfais me rends tel benefice, Ne plus ne moins com fit le faux Jason A Medée, qui lui fit tel service Qu’il en conquist la dorée toyson, Pour lui laissa sa terre et sa maison, Dont lui rendi après petit d’honneur ; Encor me fais pis sans comparoison. Ha desloial ! comment as tu le cuer ?