Pour accomplir leur bonne volonté

Aucunes gens me prient que je face Aucuns beaux diz, et que je leur envoie, Et de dittier disent que j’ai la grace ; Mais, sauve soit leur paix, je ne sçaroye Faire beaux diz ne bons ; mès toutevoye, Puis que prié m’en ont de leur bonté, Peine y mettrai, combien qu’ignorant soie, Pour accomplir leur bonne volonté. Mais je n’ai pas sentement ne espace De faire diz de soulas ne de joie ; Car ma douleur, qui toutes autres passe, Mon sentement joyeux du tout dévoie ; Mais du grant deuil qui me tient morne et coye Puis bien parler assez et a plenté ; Si en diray : volontiers plus feroye Pour accomplir leur bonne volonté. Et qui voudra savoir pour quoi efface Deuil tout mon bien, de legier le diroye : Ce fit la mort qui fery sans menace Celui de qui trestout mon bien avoye ; Laquelle mort m’a mis et met en voye De desespoir ; ne puis je n’oz santé ; De ce ferai mes dis, puis qu’on m’en proie, Pour accomplir leur bonne volonté. Princes, prenez en gré se je failloie ; Car le ditter je n’ai mie henté, Mais maint m’en ont prié, et je l’ottroye, Pour accomplir leur bonne volonté.