Car trop grief deuil est en mon cuer remais

Aucunes gens ne me finent de dire Pour quoi je suis si malencolieuse, Et plus chanter ne me voyent ne rire, Mais plus simple qu’une religieuse, Qui être sueil si gaie et si joyeuse. Mais a bon droit se je ne chante mais : Car trop grief deuil est en mon cuer remais. Et tant a fait Fortune, Dieu lui mire ! Qu’elle a changié en vie doloreuse Mes jeux, mes ris, et ce m’a fait élire Deuil pour soulas, et vie trop greveuse. Si ai raison d’être morne et songeuse, Ne n’ai espoir que j’aie mieulx jamais ; Car trop grief deuil est en mon cuer remais. Merveilles n’est se ma leesce empire ; Car en moi n’a pensée gracieuse, N’autre plaisir qui a joie me tire. Pour ce me tient rude et maugracieuse Le desplaisir de ma vie anuieuse, Et se je suis triste, je n’en puis mais ; Car trop grief deuil est en mon cuer remais.