Ballade XXV (Mon cueur a envoyé querir)

Mon cueur a envoyé querir Tous ses bien vueillans et amis, Il veut son grant conseil tenir Avec eux, pour avoir advis Comment pourra ses ennemis, Soussy, Deuil et leur aliance, Surmonter et tôt deconfire, Qui désirent de le destruire En la prison de Desplaisance. En désert ont mis son plaisir, Et joie tenue en pastis ; Mais Confort lui a, sans faillir, De nouvel loyaument promis Qu’ilz seront deffais et bannis ; De ce se fait fort Espérance, Et plus avant que n’ose dire ; C’est ce qui estaint son martyre En la prison de Desplaisance. Briefment voie le temps venir, J’en prie à Dieu de paradis. Que chacun puist vers son désir Aller sans avoir saufconduis. Adonc Amour et ses nourris Auront de Dangier moins doubtance. Et lors sentirai mon cueur rire Qui à présent souvent soupire En la prison de Desplaisance. Pource que véoir ne vous puis, Mon cueur se complaint jours et nuis Belle nonpareille de France, Et m’a chargié de vous escrire Qu’il n’a pas tout ce qu’il desire En la prison de Desplaisance.