Ballade LXI

Io fut une damoiselle Que Jupiter ama moult fort. Junon en ouÿ la nouvelle ; Se ne lui fu jeu ne deport : Du ciel descent en une nue Pour son mary surprendre ou fait ; Sur eux est tout a coup venue Si les y eût surpris de fait ; Mais il n’est nul si grant meschief Qu’on ne traye bien a bon chief. Car Jupiter d’une cautelle Se couvri ; car il fit un sort Par quoi il tresmüa la belle En une vache, mais au fort S’en est Junon si près tenue, Qui souspeçon a du meffait, Qu’elle a la vache retenue Malgré que Jupiter en ait. Mais il n’est nul si grant meschief Qu’on ne traye bien a bon chief. La vache en garde bailla celle A Argus, qui jamais ne dort ; Cent yeulz avait et la pucelle Toudis gaitoit, mais il fu mort Par Mercures qui l’en desnue, Car au vachier tant tint de plait Qu’il l’endort, puis l’a detenue ; Et ce fu a Junon moult lait. Mais il n’est nul si grant meschief Qu’on ne traye bien a bon chief. Pour ce je dis qu’une cenelle Ne vaut la garde tant soit fort, Ne a vallet ne a basselle ; Puis qu’ilz sont tous deux d’un acort, L’amour d’eulz sera maintenue Et verront, qui que deuil en ait, L’un l’autre, et en est avenue Mainte chose par tel agait ; Mais il n’est nul si grant meschief Qu’on ne traye bien a bon chief.