Ballade XCII

Avec les preux bien devez être mis, Bon chevalier vaillant, plein de proece, Qui par valeur d’armes avez soubsmis Maint grant païs et mainte forteresse. Du preux Hector vous ensuivez l’adresse, Et de Cesar qui fu sage et vaillant, Alixandre qui s’ala travaillant Tant qu’il conquist le monde entièrement, Et a Judas Machabée ensement, Au bon David, Josüé, par tel guise, Ainsi est il de vous certainement, En qui Dieux a toute proece assise. Charles le grant a qui Dieu fu amis, Le bon Artus ou tant ot de noblesse, A Godefroy qui fut grands ennemis Aux mescreans, trop leur fit de destrece, Votre bonté d’eux ensuivir s’adresse. Par employer trestout votre vaillant A conquerir a l’épée taillant Pris et honneur, si semblez droittement Le droit soleil qui luit ou firmament, Que chacun veut désirer, aime et prise, Ainsi est il de vous certainement, En qui Dieux a toute proece assise. Et tant vous a Dieu donné et promis De ses hauls biens et a si grant largece, Que se vivait adès Semiramis, Qui jadis fu roÿne et grant maîtresse, L’amour de vous tendroit a grant richece. Car bien qui soit n’est en vous deffaillant : N’en nesun cas nul ne vous voit faillant, Par tout le monde en tient on parlement. Les bons Rommains jadis si vaillamment Se porterent qu’ilz ont louange acquise, Ainsi est il de vous certainement, En qui Dieux a toute proece assise.