C’est bien raison que me doive doloir

Il y a long temps que mon mal comença, N’oncques despuis ne fina d’empirer Mon las estat, qui puis ne s’avanca, Que Fortune me voult si atirer Qu’il me convint de moi tout bien tirer ; Et du grief mal qu’il me fault recevoir C’est bien raison que me doive doloir. Le deuil que j’ai si me tient de pieça, Mais tant est grant qu’il me fait désirer Mourir briefment, car trop mal me cassa Quant ce m’avint qui me fait aïrer ; Ne je ne puis de nul côté virer, Que je voie riens qui me puist valoir. C’est bien raison que me doive doloir. Ce fit meseur qui me desavança, Et Fortune qui voult tout dessirer Mon boneür ; car depuis lors en ça Nul bien ne pos par devers moi tirer, Ne je ne sais penser ne remirer Comment je vif ; et de tel mal avoir C’est bien raison que me doive doloir.