Douce dame, je me rends a vous pris

Votre beaulté, vo gracieux accueil, A si mon cuer de vous enamoré, Dame plaisant, et vo doulz riant oeil, Que, se je n’ai votre amour, je morré Prochainement, et frémir Fait tout mon cuer quant vo beaulté remir ; Tant suis forment de votre amour épris, Douce dame, je me rends a vous pris. Voiez comment pour vous de pleurs me mueil, Par quoi vivre longuement ne porré Pour l’amoureux mal dont si fort me dueil, Que ja m’a près que mort et acouré. Dame que je vueil cremir, Ayez pitié de moi qui escremir Ne puis vers vous, et com d’amer surpris, Douce dame, je me rends a vous pris. Et trés plaisant cuer, gentil, sans orgueil, Doulz corsellet de moi trés aouré, Je ne désir autre chose, ne vueil Qu’un doulz baiser de vous assavoré ; Plus ne devroye gémir Se du trés doulz viaire ou je me mir Avais ce ; mais se j’ai riens mespris, Douce dame, je me rends a vous pris.