Mais fol ne croit jusqu’il prend

Qui que die le contraire, On doit loyauté tenir En tout quanque l’en veut faire, Qui veut a grant preu venir ; Et qui barat maintenir Veut, a la fin mal lui prend, Mais fol ne croit jusqu’il prend. Loyauté est neccessaire A qui tent a avenir, A honneur et grant salaire ; N’il ne doit apartenir Que cil doive bien fenir, Qui a barater se prend, Mais fol ne croit jusqu’il prend. Et trop mieulx se vauldroit taire, Que de dire et soutenir Que de loyauté retraire Se convient, qui devenir Veut riche, et fraude tenir ; Qui le fait au las se prend, Mais fol ne croit jusqu’il prend.