Qu’a toujours mais je pleureray sa mort

Seulette m’a laissié en grant martyre, En ce désert monde plein de tristece, Mon doulz ami, qui en joie sans ire Tenait mon cuer, et en toute leesce. Or est il mort, dont si grief deuil m’oppresse, Et tel tristour a mon las cuer s’amord Qu’a toujours mais je pleureray sa mort. Qu’en puis je mais, se je pleure et soupire Mon ami mort, et quelle merveille est ce ? Car quant mon cuer parfondement remire Comment souef j’ai vécu sans asprece Trés mon enfance et premiere jeunece Avecques lui, si grant doulour me mord Qu’a toujours mais je pleureray sa mort. Com turtre suis sans per qui ne desire Nulle verdour, ains vers le sec s’adresse, Ou com brebis que lop tache a occire, Qui s’esbaïst quant son pastour la laisse ; Ainsi suis je laissiée, en grant destrece, De mon ami, dont j’ai si grant remord Qu’a toujours mais je pleureray sa mort.