Quant bien me doit venir, meseur l’en chace

Je ne crois pas que ma malle fortune Puisse souffrir qu’aucun bien me secuere ; Car de long temps, par rigle trop commune, M’a couru sus, et quanque je laboure N’est fors en vain ; car tout despiece en l’eure La desloyal qui tout mal me pourchace ; Quant bien me doit venir, meseur l’en chace. N’il ne me vient a nulle heure pas une Riens a droit point, pour chose que je queure, La ou secours cuid trouver, mais nesune Voie n’y a : il fault que je demeure A toujours mais ainsi, par quoi je pleure Souvent, veant que, par diverse chace, Quant bien me doit venir, meseur l’en chace. Et puis qu’ainsi tel fortune respune A tout boneur pour moi et tout deveure Mes reconfors, avoir ne dois aucune Espérance de jamais veoir l’eure D’avoir reppos du mal qui m’acuere ; Car je congnois qu’a tout quanque rechace, Quant bien me doit venir, meseur l’en chace. Princes, ainsi a cuer plus noir que meure Me fault lenguir ; car tout vent me dechace ; Est ce bien droit meschiel qui me cuert seure, Quant bien me doit venir, meseur l’en chace ?