Voyez comment amours amans ordonne !

Quant Lehander passoit la mer salée, Non pas en nef, ne en batel a nage, Mais tout a nou, par nuit, en recellée, Entreprenoit le périlleux passage Pour la belle Hero au clair visage, Qui demouroit ou chastel d’Abidonne, De l’autre part, assez près du rivage ; Voyez comment amours amans ordonne ! Ce braz de mer, que l’en clamoit Hellée, Passoit souvent le ber de haut parage Pour sa dame veoir, et que cellée Fut celle amour ou son cuer fu en gage. Mais Fortune qui a fait maint outrage, Et a mains bons assez de meschiefs donne, Fit en la mer trop tempesteux orage. Voiés comment amours amans ordonne ! En celle mer, qui fu parfonde et lée, Fu Lehander peri, ce fu domage ; Dont la belle fu si fort adoulée Qu’en mer sailli sans querir avantage. Ainsi pery furent d’un seul courage. Mirez vous cy, sans que je plus sermone, Tous amoureux pris d’amoureuse rage. Voyez comment amours amans ordonne ! Mais je me doubt que perdu soit l’usage D’ainsi amer a trestoute personne ; Mais grant amour fait un fol du plus sage. Voyez comment amours amans ordonne !