On vous doit bien de laurier couronner

Bien viegnez bons, bien viegniez renommez. Bien viegniez vous chevaliers de grant pris, Bien viegniez preux et de chacun clamez Vaillants et fors et aux armes appris ; Être appellez devez en tout pourpris Chevalereux, trés vertueux et fermes, Durs a travail pour grands cops ramener, Fors et eslus, et pour vos belles armes On vous doit bien de laurier couronner. Vous, bon seigneur du Chastel, qui aimez Êtes de ceux qui ont tout bien empris ; Vous, Bataille, vaillant et affermez ; Et Barbasan, en qui n’a nul mespris ; Champaigne, aussi de grant vaillance épris ; Et Archambault ; Clignet aux belles armes ; Keralouÿs ; vous tous sept, pour donner Exemple aux bons et grant joie a vos dames, On vous doit bien de laurier couronner. Or avez vous nos nuisans diffamés, Louez soit Dieux qui de si grands perilz Vous a gittez, tant vous a enamez Que vous avez desconfiz, mors et pris Les sept Anglois de grant orgueil surpris, Dont loz avez et d’ommes et de femmes ; Et puis que Dieux a joie retourner Victorieux vous fait ou corps les ames, On vous doit bien de laurier couronner. Jadis les bons on couronnoit de palmes Et de laurier en signe de régner ; En haut honneur et, pour suivre ces termes, On vous doit bien de laurier couronner.