Vertomne estant bruslé d’un tel feu que le mien

Vertomne estant bruslé d’un tel feu que le mien, Pipé qu’il fust des yeux de la nymphe Pomone, Pour amolir le sein de sa dame felonne Changea comme il voulut de forme & de maintien. Mais helas mon pouvoir n’est tel que fust le sien ! Il s’habilla en vieille à la teste grisonne, Et puis en Adonis, & lors jouit Vertomne De ce qu’il adorait pour son souverain bien. Je suis bien seur du poinct, vous n’aimez pas, Deesse, Le front ensillonné d’une froide vieillesse, Un marcher tremblottant, deux yeux pasles, ternis ; Si j’etois en ma forme inconstant & muable, Je formeroy’ mon corps pour le faire amiable . Comme mon ame est belle, il seroit Adonis.