Soit, sans cesser, toute joie mondaine

Redoutée, excellent, trés sage et digne, Noble, vaillant, de haut honneur porprise, Renommée Reine trés bénigne, La souvraine des dames que l’en prise, Je pri cil Dieu, qui sur tout a maistrise, Qui a ce jour de l’an si bonne estraine Il vous envoit qu’adès en vous éprise Soit, sans cesser, toute joie mondaine. Ma redoutée, ou tout le monde encline, Pour ce que sais que, comme bien aprise, Livres aimez, moi votre serve indigne Vous envoie cestui ou est comprise Matière qu’ai en haute place prise ; En gré l’ayez, trés noble et de sens pleine, En qui toujours, sans ja être desprise, Soit, sans cesser, toute joie mondaine. Et s’il vous plaît, trés puissant, vraie et fine, Que votre grant haultece un petit lise En mon dittié, et vo sens détermine De la cause qui est en termes mise. Mieulx en vauldra en tout cas mon emprise. Si en jugiez, princepce trés hautaine, A qui Dieux doint grace qu’en toute guise Soit, sans cesser, toute joie mondaine. Haute, puissant et pleine de franchise, Trés humblement a vo valeur certaine Me recomand en qui trouvée et quise Soit, sans cesser, toute joie mondaine.