Qui des sages font grant derrision

Tous hommes ont le désir de savoir Et a bon droit il n’est si grant richece ; Mais puis que tous veulent science avoir, Comment veut nul desprisier tel hautece, Car ilz sont maint qui n’en ont pas largece, Ne de leur fait n’est nulle mension, Qui des sages font grant derrision. Et pour ce dit le philosophe voir, Que le plus grand anemi de sagece C’est l’ignorant ; mais maint pour nul avoir Ne pourraient hebergier tel hostesse, Dieux la donne par esleue promesse ; Mais pluseurs sont sans nulle occasion, Qui des sages font grant derrision. Si doit on bien mettre force et devoir A acquerir si trés noble richece ; Car qui bien l’a, trop est grant son pouvoir. Trés eureux sont ceux dont elle est princece De gouverner tous leurs fais com maistrece. Entre eulz et ceux sont en division Qui des sages font grand derrision.