Si tost que vostre coche a peu ensemble avoir

Si tost que vostre coche a peu ensemble avoir Un amour si tres ferme, & si tres preécieuse. Indigne de porter charge si gratieuse, Un desplaisir esgal il nous fit recevoir. Il est versé par terre, en cela je puis voir Que fortune ne veut m’estre si rigoureuse Que si elle n’estoit que pour vous malheureuse ; Si j’interprète mal, je me veux decepvoir : Doux bien, douce douleur qui nous sera commune, Je me desdi’ du mal que j’ay dit de fortune Si mon mal & mon bien sont unis avecq’vous ; Je ne vous cerche pas compagne en ma tristesse, Mais j’aimeroy fortune, & ses coups seront doux Si la playe d’amour nous unist, & nous blesse.