Et ne croyez flajolz de decepveurs

Dames d’honneur, gardez vos renommées, Pour Dieu mercis eschevez le contraire De bon renom, que ne soyez blasmées ; Ne veuillez point acointances attraire Telles, qu’on puist recorder ne retraire Par vos maintiens qu’ayez legiers les cœurs, Ne qu’en nul cas vous daignissiez meffaire, Et ne croyez flajolz de decepveurs. Car pou vous vaut cuidier bien être amées D’ommes pluseurs, de recepvoir salaire De mauvais loz, par parolles semées En divers lieux, qu’il eût en votre affaire Legiereté ; si vous est neccessaire D’avoir recort toudis des deshonneurs, La ou choir on puet par foulour faire, Et ne croyez flajolz de decepveurs. Or soyez dont de parfait scens armées Contre ceux, qui tant taschent a soubztraire L’honneur de vous, et de qui diffamées Êtes souvent sans cause, et pour vous plaire Font le courtoys ; et je ne m’en puis taire, Car j’en congnois et sais de tels vanleurs Qui vous flattent ; veuillez vous ent retraire, Et ne croyez flajolz de decepveurs. Chères dames, ne vous veuille desplaire, Se je vous lo a garder des flateurs Qui ne taschent qu’a vos honneurs deffaire, Et ne croyez flajolz de decepveurs.