Nous ferons, ma Diane, un jardin fructueux

Nous ferons, ma Diane, un jardin fructueux : J’en seray laboureur, vous dame & gardienne. Vous donnerez le champ, je fourniray de peine, Afin que son honneur soit commun à nous deux. Les fleurs dont ce parterre esjouira nos yeux Seront verds florissants, leurs subjects sont la graine, Mes yeux l’arroseront & seront sa fontaine, Il aura pour zephirs mes souspirs amoureux ; Vous y verrez mellés mille beautez escloses, Soucis, œillets & lys, sans espines les roses, Encolie & pensee, & pourrez y choisir Fruicts succrez de duree, aprés des fleurs d’attente, Et puis nous partirons à vostre choix la rente : A moy toute la peine, & à vous le plaisir.