Car de ce vueil savoir le compte

Tu soies le trés bien venu, M’amour, or m’embrace et me baise Et comment t’es tu maintenu Puis ton départ ? Sain et bien aise As tu été toujours ? Ça viens, Coste moi, te sié et me conte Comment t’a été, mal ou bien, Car de ce vueil savoir le compte. — Ma dame, a qui je suis tenu Plus que autre, a nul n’en desplaise, Saches que désir m’a tenu Si court qu’onques n’oz tel mesaise, Ne plaisir ne prenoie en rien Loin de vous. Amours, qui cœurs dompte, Me disait : « Loyauté me tien, Car de ce vueil savoir le compte ». — Dont m’as tu ton serment tenu, Bon gré t’en sais, par saint Nicaise ; Et puis que sain es revenu Joie arons assez ; or t’apaise Et me dis se scez de combien Le mal qu’en as eu a plus monte Que cil qu’ a souffert le cuer mien, Car de ce vueil savoir le compte. — Plus mal que vous, si com retien, Ai eu, mais dites sans mescontc Quans baisiers en aurai je bien ? Car de ce vueil savoir le compte.