Le Testament, huitains CXXXII à CXXXIII

Item, à maistre Jehan Courault, Les Contredictz Franc-Gontier mande : Quant du Tyrant seant en hault, A cestuy-là rien ne demande ; Le saige ne veult que contende, Contre puissant, pouvre homme las, Affin que ses filez ne tende, Et que ne tresbuche en ses laqs. Gontier ne crains : il n’a nulz hommes Et mieulx que moy n’est herité ; Mais en ce debat cy nous sommes, Car il loue sa pouvreté : Estre pouvre, yver et esté, A felicité il repute, Ce que tiens à malheureté. Lequel à tort ? Or en dispute.