Auprés de ce beau teinct le lys en noir se change

Auprés de ce beau teinct le lys en noir se change, Le laict est bazané auprés de ce beau teinct, Du cygne la blancheur auprés de vous s’esteinct, Et celle du papier où est vostre louange. Le succre est blanc, & lorsqu’en la bouche on le range Le goust plaist, comme faict le lustre qui le peinct, Plus blanc est l’arcenic, mais c’est un lustre feinct, Car c’est mort, c’est poison à celuy qui le mange. Vostre blanc en plaisir taint ma rouge douleur. Soyez douce du goust, comme belle en couleur, Que mon espoir ne soit desmenty par l’espreuve, Vostre blanc ne soit point d’aconite noircy, Car ce sera ma mort, belle, si je vous trouve Aussi blanche que neige & froide tout ainsi.