Si le veuillez, noble duc, recevoir

Très noble, haut, puissant, plein de sagesse, D’Orliens duc Loys trés redoubtable, Mon redoubté seigneur, en grant humblece Me recommand a vous, prince notable, En désirant faire chose agréable A vous, vaillant seigneur de haute emprise. Et si vous viens donner d’amour éprise La riens qui soit que dois plus chier avoir Et soubzmettre du tout a vo franchise, Si le veuillez, noble duc, recevoir. C’est un mien filz, lequel de sa jonnece A bon vouloir d’être en son temps valable Et désir a selon sa petitece De vous servir, sil vous est acceptable ; Pour ce suppli, vaillant prince amiable, Qu’il vous plaise le prendre a vo servise. Don vous en fais, et tout a vo devise Faire de lui veuillez, car bon vouloir De vous servir a de cuer en craintise ; Si le veuillez, noble duc, recevoir. Ja trois ans a que pour sa grant prouesse L’en amena le conte trés louable De Salsbery, qui moru a destrece Ou mal païs d’Angleterre, ou muable Y sont la gent ; depuis lors, n’est pas fable, Y a été, si ai tel peine mise Que je le ray non obstant qu’a sa guise L’avait Henry qui de la se dit hoir, Or vous en fais je don de foi aprise, Si le veuillez, noble duc, recevoir. Prince excellent que chacun loue et prise. Du requerir je ne soye reprise N’escondite, car de tel qu’ai savoir Mon service vous ottroy sans faintise, Si le veuillez, noble duc, recevoir.