Hé Dieux me doint pouvoir du desservir !
Christine de Pizan
Cent Ballades
Chère dame, certes je ne pourroie
Vous mercier assez souffisamment
Du noble don que vo doulz cuer envoie
A moi, qui suis votre serf ligement,
De me donner l’amour entièrement
De vous que j’aime et désir a servir ;
Hé Dieux me doint pouvoir du desservir !
Or avez vous remply de toute joye
Mon pauvre cuer, et osté le tourment
Que par long temps pour vous souffert avoye ;
Or m’avez vous merci trop grandement.
Pensé avez de mon avancement
De moi vouloir de tous biens assouvir ;
Hé Dieux me doint pouvoir du desservir !
Or seray gai trop plus que ne souloie,
Et bien est droit que vive liement ;
Car tant me plaît que votre amour soit moye
Que, se le monde était mien quittement,
Mieulz voudrais je perdre entièrement
Que votre amour, ou me vueil asservir ;
Hé Dieux me doint pouvoir du desservir !